Isa 30 | JAE | STEP | Apômtau kêsôm gebe “Ojae lau, taŋ sêli tauŋ sa gêdêŋ aê naŋ. Êsêac taêŋ gêjam biŋ, taŋ aê kamasaŋ atom naŋ, to sêgôm ŋanô kêsa ma sêmoatiŋ poac keso aêŋoc Ŋalau, tec têtêku sec gêsac sec ŋaô.

Isaiah 30

Taeŋ êka Aiguptuŋa ŋanô masi

1 Apômtau kêsôm gebe “Ojae lau, taŋ sêli tauŋ sa gêdêŋ aê naŋ. Êsêac taêŋ gêjam biŋ, taŋ aê kamasaŋ atom naŋ, to sêgôm ŋanô kêsa ma sêmoatiŋ poac keso aêŋoc Ŋalau, tec têtêku sec gêsac sec ŋaô. 2 Êsêac dêdi sêsêp Aiguptu sêja, mago têtu kênac aê atom. Êsêac sebe sê lamu Aiguptu, tec taêŋ kêka Paraonê ŋaclai. 3 Ma Paraonê ŋaclai oc ênam amac sa atom to Aiguptu, taŋ aê lamu naŋ, êŋgôm amac majem êsa. Ma lamu, taŋ asom aŋga Aiguptu ŋaajuŋlabu naŋ, oc êmbu amac. 4 Biŋŋanô, laumata Aiguptuŋa sêŋgôŋ Soan ma ŋajaeŋwaga sêô lasê Hanes, 5 mago lau Judaŋa majeŋ êsa gebe taêŋ kêka lau, taŋ sênam êsêac sa naeo naŋ. Lau Aiguptuŋa tonaŋ oc sênam amac sa to sêpuc amac tôŋ atom, oc sênam lau majeŋ êsa to seseŋ êsêac waeŋ ŋajam su.”

6 Anôtônê biŋ kêpi bôc Negebŋa tonec gebe “Laujaeŋ sêsêlêŋ sêsa gamêŋ, taŋ kêtakê to kêlênsôŋ lau naŋ. Lewe ma moacwêm ma moactêna kaiŋ teŋ sêmoa gamêŋ tau. Laujaeŋ tau sêkêŋ nêŋ waba to awamata gêsac doŋki to kamele ŋaô. Êsêac sebe sêkêŋ gêŋ tau dêdêŋ lau, taŋ têtôm gebe sênam êsêac sa atomanô naŋ. 7 Aiguptu ênam êsêac sa naeo to ŋaôma. Tec kasam gamêŋ tau gebe ‘Rahab, taŋ gêŋgôŋ e ŋaŋêŋ laŋgwageŋ.’”

Lau taŋeŋpêcŋa

8 Go Anôtô kêsôm gêdêŋ aê gebe “Ôna oto biŋ tonaŋ êpi poctapa êsêac sêlic ma oto êsêp buku teŋ gebe ênêc endeŋ tôŋgeŋ. Gebe lau ŋamuŋa sêsam e sêjala miŋ tau. 9 Gebe lau tonaŋ sêli tauŋ sa gêdêŋ Anôtô ŋapaŋ. Êsêac biŋdansaŋ ŋalatui ma sêkêŋ taŋeŋ Apômtaunê ŋagôliŋ atom. 10 Êsêac sêsôm gêdêŋ lau-geoc-biŋ-lasêwaga gebe ‘Alic gêŋ teŋ atom.’ Ma gêdêŋ propete gebe ‘Aoc biŋŋanô lasê êndêŋ aêac atom. Asôm biŋ, taŋ aêac abe aŋôgeŋ naŋ lasê. Akêŋ aêac akôc ma biŋ taêŋ gêjamŋa tôŋ. 11 Akêŋ ŋasawa ma akô intêna auc atom. Aêac abe aŋô Israelnêŋ Anôtô Dabuŋ nê biŋ êtiam atom.’”

12 Mago Israelnêŋ Anôtô Dabuŋ kêsôm gebe “Amac adec biŋ, taŋ kasôm gêdêŋ amac ma taêm kêka ŋaclai sec to biŋdansaŋ gebe êtu amacnêm seŋeŋ. 13 Kêtu tonaŋŋa amac awê biŋ ŋakaiŋ. Amac atôm tuŋbôm baliŋ, taŋ kêôpacgeŋ naŋ. Amac aku sa sep tageŋ naguluŋ. 14 Amac popoc amboac kuanô, atôm ku, taŋ selo popoc samucgeŋ naŋ, e ŋasaboac teŋ êtôm gebe sêkêŋ ja ŋalana êsêp ma sêkati buŋa atom.”

15 Gebe Apômtau Anôtô, Israelnêŋ Ŋac Dabuŋ kêsôm gebe “Embe anam taôm ôkwi ma akêŋ êwiŋ aêgeŋ, naŋ oc janam amac kêsi. Aŋgôm ŋaŋêŋ ma akêŋ matem aêgeŋ, go nêm ŋaclai êsa.” 16 Mago amac akêŋ taŋem atom ma asom gebe “Masi, aêac oc aŋgôŋ hos ma aêc su.” Tec amac oc aêc su biŋŋanô. Ma asôm gebe “Aêac oc aŋgôŋ hos ma aêc su weŋ tageŋ.” Tec nêm ŋacjo oc sêjanda amac weŋ tageŋ amboac tonaŋgeŋ. 17 Ŋacjo tageŋ embe êkôtêŋ lêma, go amacnêm lau tausen oc sêc su. Ŋacjo lemeŋ teŋ embe sêkôtêŋ lemeŋ ma amac samob aêc su e obokêam ŋajamoa taugeŋ êkô lôc ŋaô êtu ŋabelo teŋ. Mago Apômtau gêôŋ amac gêmoa gebe taê walô amac. Eŋ gêdi gebe têtac labu amac gebe Apômtau eŋ Anôtô gêdêŋ ma lau, taŋ sêôŋ eŋ naŋ, oc têntac ŋajam êsa.

18

30:19-33 Anôtô taê walô nê lau, taŋ sêôc gêŋwapac to ŋandaŋ ma êmêtôc lau Asuria.